Падера авылының "Очрашу" ансамбле "Түгәрәк уен”да катнашты
"Очрашу" ансамбле
23.09.2011
хәмидә гайфуллина
Удмуртиянең Балезино районы Падера авылында берничә ел элек кенә оешкан өлкән яшьтәге апа-әбиләрнең "Очрашу" ансамбле Перьмдә үткән "Түгәрәк уен” IV Бөтенрусия татар фольклоры фестивалендә катнашты һәм "Иң яхшы вокал” бәйгесендә икенче урынны алды.
Пермьдәге "Түгәрәк уен” фестивалендә яшьләр бик күп иде
Удмуртиянең төньягында урнашкан татар авылларында халкыбызның гореф-гадәтләрен, йолаларын, борынгы көйләрен, саклап калу буенча күп көч куела. Балезино районының авыл мәдәният йортларында бу юнәлештә аеруча актив эш алып барыла.
Падера авылының "Очрашу” ансамбленә әле өч кенә ел. Әмма алар инде республикада, Балезино районында оештырылган төрле мәдәният бәйгеләрендә катнашып, тамашачы күңелен яулады.
Ансамбль үз төбәкләрендә элек-электән җырланган көйләрне саклап калып, аларны сәхнәдә башкару максатын үзалларына куйган. Шул ук вакытта борынгы җырларны яшь буынга өйрәтеп калдыруны да күз уңаенда тота. Аларның башкару алымнары да бик үзенчәлекле. Шундый җырларның берсе – "Солдатка озату”. Нәкъ шушы җыр "Түгәрәк уен” IV Бөтенрусия татар фольклоры фестиваленең жюри төркеме тарафыннан яклау тапкан.
"Беренче тапкыр шундый зур күләмле фестивальдә катнашып икенче урын алу – ансамбльнең дөрес юнәлеш алып баруы турында сөйли”, диде авыл мәктәбе укытучысы Альбина Касимова.
Унбиш төбәктән килгән 450-дән артык халык иҗатын башкаручылар белән аралашып кайткан "Очрашу” ансамбле әгъзалары шундый чараларга тагын барырга ниятли.
Искәрмәләр: Мәкалә "Азатлык радиосы" сайтыннан алынды. Авторы УТИҮ әгъзасы Х.Х.Гайфуллина. УТИҮ Президенты Ф.Мирзаянов Удмуртия һәвәскәрләрен Пермь шәһәренә җибәрүгә 3000 сум акчалата ярдәм күрсәтте. Татарстан Президенты Р.Н.Миңнеханов бүләк иткән микроавтобусны "Яңарыш" гәҗите мөхәррире Р.Габбасова УТМММ рәисе Н.С.Касимова күрсәтмәсе буенча бирелде. (УТИҮ идарәсе)
|
